रसुवाको भोटेकोशी नदीमा आएको बाढी प्रभावित नागरिकका लागि रसुवा र नुवाकोटका विभिन्न २६ स्थानमा अस्थायी आश्रयस्थल तथा राहत वितरण केन्द्र सञ्चालनमा ल्याइएको छ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार आइतबार मात्रै दुई जिल्लाका ३ हजार ४५४ जना विपद् प्रभावितलाई आश्रय तथा राहत प्रदान गरिएको छ।
प्राधिकरणका प्रवक्ता शान्ति महतका अनुसार नुवाकोट जिल्लामा मात्रै १६ वटा आश्रयस्थल तथा शिविरमार्फत २ हजार २७४ नागरिकलाई सुरक्षित राखिएको छ।
भौगोलिक विकटताका कारण अधिकांश क्षेत्रमा हेलिकप्टरमार्फत राहत ढुवानी गरिएको छ। प्रभावितहरूको उपचारका लागि धुञ्चेस्थित रसुवा जिल्ला अस्पतालमा सशस्त्र प्रहरी बलको टोली, स्याफ्रुबेँसीमा वीर अस्पतालको टोली, हेलिक्षेत्रमा प्रादेशिक अस्पताल र नेपाली सेनाको स्वास्थ्य टोली उपचारमा सक्रिय रूपमा खटिएका छन्।
