शिवरात्रि पर्वलाई सुरक्षित र व्यवस्थित बनाउन विगतको कमजोरी दोहोरिन नदिन आग्रह गरेको छ

काठमाडौँ महानगरपालिकाले आगामी फागुन तीन गते परेको शिवरात्रि पर्वलाई सुरक्षित र व्यवस्थित बनाउन साझेदारहरूलाई विगतको कमजोरी दोहोरिन नदिन आग्रह गरेको छ । कामपाको कार्यवाहक प्रमुख सुनिता डङ्गोलले साझेदारसँग छलफल गर्दै विगतमा जस्तो कमी कमजोरी हुन नदिन आग्रह गरेकी हुन् ।

महानगरभित्रका शिव मन्दिरहरू सबैमा कामपाको समान दृष्टि हुनेछ । उनले भनिन्, “कामपाको तर्फबाट सम्पदा तथा पर्यटन समितिका संयोजक तथा पशुपति भएको वडा नम्बर ८ का अध्यक्ष आशामान संगतले संयोजन गर्नुहुनेछ । उहाँ  सँगै छिमेकी वडा नं. ७ का अध्यक्ष बिमलकुमार होडा र शिव मन्दिर भएका सम्बन्धित वडाका जनप्रतिनिधिले कामपाका तर्फबाट संयोजन गर्नुहुनेछ ।”

बैठकमा सम्पदा तथा पर्यटन समितिका संयोजक संगतले, विगतमा पर्व व्यवस्थापनका लागि स्थानीयले निर्वाह गर्दै आएको भूमिका खोसिँदै गएको बताउँदै स्थानीय सहभागी नभएको पर्व जीवन्त हुन नसक्ने बताए । सशस्त्र प्रहरी उपरीक्षक जीवन केसी ले निर्वाचन सुरक्षा कार्यक्रम सुरु भइसकेकोले यस वर्ष जनशक्ति व्यवस्थापनमा थप काम गर्नु पर्ने अवस्था रहेको बताए ।

यस वर्ष पशुपतिमा करिब ८ लाख श्रद्धालुले मन्दिरको प्रत्यक्ष दर्शन गर्ने अनुमान छ । मन्दिर परिसरमा करिब २० लाख श्रद्धालुहरू आउने अनुमान छ । यस पर्वका लागि काठमाडौँको पशुपति क्षेत्रसहित बसन्तपुर क्षेत्रमा रहेको महेन्द्रेश्वर महादेव, वडा नं। ३२ मा रहेको कोटेश्वर महादेवसहित विभिन्न शिव मन्दिरहरूमा श्रद्धालुहरूको भिड हुने गरेको छ ।