काठमाडौं- राहदानी विभागको इलेक्ट्रोनिक मेसिन रिडेबल ट्राभल डकुमेन्ट (ईएआरटीडीएस) खरिद प्रक्रियामा गम्भीर भ्रष्टाचार गरेको आरोपमा अख्तियार दुरुपयोग अनुसन्धान आयोगले विशेष अदालत काठमाडौंमा मुद्दा दायर गरेको छ।
आयोगले दुई जर्मन कम्पनी मुहलबाउर आईडी सर्भिसेज जीएमबीएच र भेरिडोस जीएमबीएचसँग मिलेमतो गरी बोलपत्र प्रक्रिया तोडमरोड गरेर ठेक्का दिइएको आरोप लगाएको छ।
यसबाट नेपाल सरकारलाई १० अर्ब १३ करोड ४ लाख ६१ हजार ४७७ रुपैयाँ बराबरको ठूलो घाटा पुर्याएको आरोप अख्तियारले लगाएको छ। यसबाट राष्ट्रसेवक कर्मचारी तथा कम्पनीहरूलाई गैरकानुनी लाभ र सरकारलाई ठूलो हानि पुर्याइएको आयोगको निष्कर्ष छ।
अख्तियारका प्रवक्ता सुरेश न्यौपानेले उजुरीको आधारमा विस्तृत अनुसन्धानपछि आरोपपत्र दायर गरिएको बताएका छन्। यो हालका वर्षहरूमा अख्तियारले दायर गरेको सबैभन्दा ठूलो भ्रष्टाचार मुद्दामध्ये एक हो।
नेपालको राहदानी प्रणालीलाई आधुनिक र सुरक्षित बनाउने उद्देश्यले यो ठेक्का आह्वान गरिएको थियो। तर विभिन्न सञ्चारमाध्यमले यसमा पारदर्शिता र अनियमितताको विषयमा पहिलेदेखि नै प्रश्न उठाउँदै आएका थिए।
