जुम्ला – यहाँको प्रसिद्ध मार्सी धानको बीउ राखिएको छ । परम्परागत रीतिरिवाजअनुसार चैत १२ गते घरमा उमारेको बीउ चैत २० गते बेर्ना राख्ने चलन रहिआएकाले यस वर्ष पनि सोहीअनुसार गरिएको नागरिक समाज जुम्लाका संयोजक राजबहादुर महतले जानकारी दिए ।
पुरानो संस्कारअनुसार चैत १२ गते बीउलाई बोराभित्र राखेर पानीमा भिजाइन्छ । १६ गते बाहिर निकालिन्छ र २० गते बेर्नाका लागि छरिन्छ । यहाँ हरेक वर्ष चैत २० गते बेर्ना छर्ने गरिन्छ भने चैत १२ गते स्थानीय पर्व बारुवाँ मनाउने गरिन्छ ।
कर्णाली प्रदेश सरकारले पनि यहाँ चैत १२ लाई बारुवाँ दिवसका रूपमा मान्यता दिएको छ । विसं २०७७ जेठ १२ गते बसेको प्रदेश मन्त्रिपरिषद् बैठकले जुम्लामा चैत १२ गते धान दिवस मनाउने भनी निर्णय गरेको कृषि विकास कार्यालयका प्रमुख रामभक्त अधिकारीले जानकारीले बताए ।
